PUBLIC  SERVICE  COMMISSION  KALPHUNG
Mi tam takin Mizoram Public Service Commission hi kan hmelhriat viau laiin, a hna kalphung, a mawhphurhna leh eng chen nge State Sawrkar nena an inlaichin dan tur tih te hriat belh a chakawm maithei a. Chu mi hrereng chuan he lehkha thehlêp tak hi buatsaih a ni a. Tu pawhin he lehkha hi ngun taka a chhiar chuan Public Service Commission chungchangah thil tam tak a hriat belh ngei ang.  Chubakah hei hi dârthlalanga hmangin Mizoram  Public Service  Commission hian a hna a thawh that leh that loh te pawh awlsam takin  a bûk zung zung theih dawn a ni.  Mi thenkhatin rin thil thu-a Commission chu inla hrang hlak, State Sawrkar nena inlaichinna nei hauh lo va an sawi te emaw, chutih laiin thenkhatin Commission chu Sawrkar thu thu a awm zel tura ngaihna atanga thu inchuh te a awm a nih pawhin he lehkha  hian a sawifiah turah ngaih a ni.  Awle, heti hian lo sawi tan dawn ila.


Public Service Commission chu tu siam nge?
India ram Danbul (Constitution) Article 315 (1)-ah chuan Sawrkar Laipui leh State te tan Public Service Commission din ngei tur a nih thu tarlan a ni a.  A tul chuan State pahnih emaw a aia tamin emaw Public Service Commission intawm Joint PSC an neih phalsak an ni bawk.  Constitution duangtute khan Sawrkar hnuaia hnathawktu lak tur chungchangah Sawrkar ding laiin mahni  Party mite duhsakna, “Spoils System” an hman  an duh lo va.  Sawrkar hnathawk te chu an thiamna behchhan chauhva lak an nih hian mipui rorelna dik tak neih theih a ni dawn tih an hriat vang a ni. PSC chu ding hrang nalh niin, hleih neih lohna leh rinawmna te hi a innghahna chu an ni ber.


Engtin nge Chairman leh Member te an ruat?
Hei hi Constitution Article 316(1)-ah chiang taka tarlan a ni a. UPSC emaw Joint Public Service Commission Chairman leh Member turte chu President-in a ruat ang a, State PSC Chairman leh Member tur te chu Governor-in a ruat ang tih a ni.  Tin, eng PSC-ah pawh member zawng zawng atangin a chanve ang vel (nearly) chu India sawrkar emaw State sawrkar hnuai emaw-a kum 10 tal hna lo thawk tawh an ni tur  a ni tih a ni bawk.
 

Chairman leh Member nih theih chhung hi engtia rei nge?
PSC Chairman leh Member te hian kum ruk chhung an hna an chelh thei a. Amaherawhchu UPSC atan kum 65, Joint Commission leh State PSC atan kum 62 an tlin thleng chauhva thawh theih a ni.  Chu mi awmzia chu Member tu emaw kum 60 a nih chiahin lut ta sela, UPSC ah kum 5, State PSC ah kum 2 chauh a thawk hman dawn tihna  a ni.


Chairman leh member te tan thiamna (educational qualification) a awm em?
Awm lo ve. Costitution pawhin hei hi a sawi lo va.  A ruattuin tha a tih danah a innghat a ni mai.  Sawrkar hnathawk lai Matric pass chauh pawh mi rinawm leh fel a nih chuan a ruat theih tho.  Chutih lai erawh chuan vawiin thlengin lehkhathiama ngaih graduate leh a chung lam te hi ruat an ni tlangpui thin.
 

Chairman emaw member-in emaw ban lo duh ta sela..?
Constitution Article 316(2)(a)-ah chuan chiang taka ziak leh a ni a.  Mahni kut ngeia ziakin UPSC leh Joint Commission-a Chairman leh Member te’n India ram President hnenah, tin, State PSC Chairman leh memberte tan Governor hnenah banna thehluh theih a ni.
 

Public Service Commission Chairman leh Member te hi paih theih an ni em?
Ni e.  Constitution Article 317(1)na dungzuiin Chairman emaw member te emaw hi bantir theih an ni a, a kawng erawh a kual viau thung.  Public Service Commission Chairman leh Member te hi a ruattu President-in khawsak dik lo (misbehaviour) avangin a bantir thei a.  Mahse President chuan Supreme Court-in a ngenna ang chauhvin Chairman leh Member te emaw an khawsak dik lo (misbehaviour) avangin bantirna thu a pe thei. President hnena zualkona (reference) thlen a nih hma hian  Supreme Court hian enfiahna (inquiry) a siam hmasa ngei tur a ni.
Chutianga chhuina (inquiry) a awm lai pawh chuan President-in UPSC Chairman emaw Member emaw, a nih loh leh Governor-in State PSC Chairman emaw Member emaw chhui meka awma kha a lo chawlh lailawk tir thei bawk.  vide Article 317(2).
Chutih lai chuan President-in Public Service Commission Chairman leh Member te (Union leh State PSC) te hi heng avang hian chhui chhuah kher ngai lovin a bantir nghal thei:
1.    Leibat pe thei lo ni-a thu tihtluk hnan tawh a nih chuan.
2.    He hna a chelh chhunga hna dang hlawh hmuhna a thawh tel chuan. 
3.    Taksa leh rilru hrisel lohna emaw nei a nih chuan.


Pubic Service Commission Chairman leh Member te hi bantir hi a va khirhkhan awm ve?
Dan dungzui chuan a awlsam lo viau a ni.  A chhan mawl te chu Constitution hian Public Service Commmission Chairman leh Member te hi a hum tha bik em em mai a.  Khawsak dik lo (misbehaviour) thil a nih chauh loh chuan mumal lo taka ban mai mai a phal lo tih a lang a.  Heng ram chhung office pawimawh dang chelhtu (Constitutional Dignitaries) Supreme Court leh High Court  Judge te, Comptroller and Auditor General te leh Chief Election Commissioner te khawsak dik lova puh an nih chuan Parliament-in hma a lak laiin Public Service Commission Chairman leh Member te erawh chu India rama thubuai remna sang ber Supreme Court kutah a dah daih mai a.  Hei hian politics avanga innawrna atanga fihlim tura a duh vang  a ni ber.


Engnge khawsak dan dik lo chu?
Constitution hian khawsak dan dik lo “misbehaviour” hi a sawifiah chiah lem lo va. Mahse heng thil tha lo thamna te, hlemhletna leh induhsakna dik lo te hi khawsak dik lova ngaih theih an ni ang.  Tin, Member tuin emaw Chairman chungah kut thlak sela, a nih loh leh Chairman-in examna mark te lo chawk danglam sela emaw, khawsak dik lo a tling vek ang.  Hetianga thil dik lo awm finfiah a nih chuan Supreme Court thil hmuh dan chu President-in a pawm ngei tura ngaih a ni bawk.


Public Service Commission Chairman leh Member te hian Commission an chhuahsan hnuin hna dang an thawk leh thei em?
Thei lo ve.  Article 319 naah hei hi chiang taka sawi a ni.  Hei hi Commission Chairman leh Member te’n Commission-a an thawh chhunga thlemna an tawh loh nana tih a ni. Heng constutional posts - Governor emaw High Court Judge te emaw hi chu sawrkar hnuaia hna anga ngaih a ni lo.


Public Service Commission hna ber chu eng nge ni?
Article 320 a tarlan angin Public Service Commission chuan Union leh State sawrkar hnuaia thawk tur te lak nan exam a buatsaih ang.  Hna lakna tur dan recruitment rules te, Sawrkar hnaa dah leh kaisanna tur te, hremna (disciplinary action) chungchangah te Sawrkarin  a rawn zel tur a ni.  Tin, sawrkarin sawrkar hnathawkte chunga hremna (disciplinary action) a lekkawh dawnin Commission a rawn zel bawk ang.
Amaherawhchu heta State sawrkarin an rawn zel tur a ni tih hi a nghet bur (mandatory) lem lo va.  State sawrkarin emaw Central sawrkarin emaw PSC rawn lova hma an lo lak pawhin an hmalakna chu paih theih a ni chuang lo.
Tin, Proviso to Article 320 hmangin Sawrkarin Public Service Commission a rawnna chin tur Regulation siamin a bithliah thei a, he regulation hmang hian Public Service Commission hrang hrang hna lak chin pawh a inang lo fur a, tun dinhmunah State Sawrkarin Mizoram Public Service Commission a rawnna tur chin chu Promotion case-ah Gazetted post zawng zawng, Direct Recruitment-ah Grade Pay ` 4200/- chin chunglam a ni.  Hei hian Contractual/Muster Roll Employees te pawh a huam a ni.


Eng chen nge Commission thurawn chu Sawrkarin a ngaih pawimawh tur?
Commission hnathawh hi thurawntu (advisory) a ni ber mai a. Commission thurawn hi sawrkarin a pawm ngei ngei tur a ni tih a awm lo.  Chutih lai erawh chuan sawrkarin duhdah takin PSC thurawn te a palzam  mai mai tur chu  a ni chuang lo.


Commission-in a thlan (recommend) tawh candidate te sawrkarin a pawm lo thei em?
Thei e.  A pawm loh chhan erawh chu chiang taka ziak tur a ni.  Chu chu Legislature (Parliament emaw State Legislature)-ah emaw  hmaah pharh ngei bawk tur a ni.  Chubakah Article 323(2)  dungzuia Court a inrawlha, thu ti chiang tura a koh hunin Sawrkar chuan Commission list a pawm loh chhan chu Court hmaah a pharh ngei tur a ni. Commission recommendation chu sawrkarin a pawm lo a nih chuan a vaiin a pawm lo tur a ni a; list-a mi a then pawma a then pawm loh pawh a theih loh.


Hna lak naah Chairman leh Member laina hnaite recommend theih a ni em?
Theih e.  Dan bawhchhe chunga lak an nih chauhvin Commission thutlukna chu hnawl theih  a ni. Entir nan- candidate pakhat, Chairman emaw Member emaw laina hnai kha lak tel ve a nih vang ngawtin Commission recommendation kha hnawl theih a ni lo va. Amaherawhchu candidate laina Member chu kha candidate a interview lai emaw, a hnu-a chu candidate chungchang sawi zuinnaa a tel ve chuan Commission recommendation kha hnawl theih a ni.  Hei hi Supreme Court Order,  Ashok Kumar Yadav Vs State of Haryana (1985) chungchangah hmuh theih a ni.


Interview (Personlaity Test)-ah hian Selection Board tan Member tlem thei ber (Quorum) a awm em?
Constitution hian Public Service Commission chungchangah hian a hranpa in quorum a sawi lo va.  Mizoram Public Service Commission bikah pawh State Sawrkarin Mizoram Public Service Commission Regulation hrang hrang a siamah hian quorum tarlan a awm loh avangin Mizoram Public Service Commission pawhin quorum a nei lo a ni.  Chuvangin, Chairman chauh emaw, Chairman leh Member pakhat chauh emaw pawh awm se, kha Committee proceeding kha fel lohna (invalidity) engmah a  awm lo.  Candidate an tam viau phei chuan Selection Board dang siam belhin Member tu emaw ber kha Chairmanah dah theih tho a ni.  Hei hi UPSC kal dan pawh a ni.  Entir nan, UPSC-ah khuan Chairman leh Member 10 vel an awm a.  Heng Member zawng leh Expert te hi Board pakhatah thu hovin Civil Service candidate 1000 dawn mai kha a mal malin interview ta sela ni khat chhungin candidate panga pawh an interview zo hman kher lo vang. Chuvangin Member dangte kha Board Chairmanah dahin a rualin Board pahnih emaw a aia tamin emaw khan interview kha an buaipui ta  a ni.  Tin, DPC–ah pawh chutiang tho chu a ni.  Member tin khan State leh Ministry chan bik neiin DPC Chairman an ni mai thin.  Chuvangin Interview Board-ah emaw DPC-ah emaw Member an kim lo tih vanga Commission recommendation hi hnawl ngawt theih a ni lo.


TLANGKAWMNA
Heng hi a pawimawh zual te ni-a hriat an ni a.  A duh tan chuan chhiar belh tur Constitution leh Public Service Commission-in inkaihhruaina an siam te an la awm thei ang.
Tin, Commission hian inkaihhruaina a nei hrang ve diah a.  Entir nan, Mizoram Public Service Commission chuan Conduct of Examinations Guidelines, 2013 a nei a.  He mi leh inkaihhruaina leh dan dangte pawh hi tumahin an palzam ngawt thei lo.  Eng thu leh issue-ah emaw Sawrkar leh Commission thu inhmuh loh thulh a awm a nih pawhin dan huam chhungah tha taka sawi rem theih zel  a ni. 

.............
Issued in public interest by the Mizoram Public Service Commission.
No.A.2/9/2001-MPSC. 
Aizawl, the 4th November, 2016